Monday, March 27, 2006

我的第一次:健康舞

  今日下午我去了舒適堡做運動,而且作了一個新嘗試,就係跳健康舞!其實我一直都好擔心,好怕自己跳得好樣炳,你知啦,我一向都無咩節奏感,唔識跟拍子的!我怕我呢個初哥,跳舞不成,反而亂衝亂撞,撞傷哂d同學仔呢...不過,無理由有得免費任玩,我都唔去試架嘛!

  話說我入到去跳舞室,Miss便問:「有無人係第一次來舒適堡跳健康舞?」我看看四周,有人舉手喎,原來都有好多人同我一樣,係第一次跳啊,心諗今次無死啦,肯定唔會得我一個唔識跳,所以我見人家舉手,咁我咪又跟住舉手,之後Miss又問:「有無人係從未跳過健康舞呢?」今次我醒啦,自己第一個舉手!...但等左一陣,似乎都只有我一隻手在空中高舉著呢...當我想縮返隻手回來時,竟然被Miss見到添,Miss仲望著我說:「唔緊要,第一次一定會跳得好亂,唔駛驚喎!」跟住全班同學都回頭望望我...勁瘀...

  音樂開始啦,嘩!音樂一響d人就不停咁左跳跳右跳跳,有時踢踢左腳,突然又踢右腳喎!我根本唔知大家跳咩!四圍的人都在動,就只有我呆站著,或勉強咁跟住大家向左「行」向右「跳」,完全係一塌糊塗!老實講,真係有諗過中途離場!
  
  不過,當我跳了約20分鐘後,踢過、拍打過不少同學仔後,我似乎已揣摩了一點點技巧,開始跟得上,終於我都完成了這節45分鐘的課!落堂時,Miss 還說:「第一次跳,又或者好無跳的同學仔,如果呢一刻仲未有放棄,無離到場的話,我就要恭喜你們了!」嘻嘻...唔知係咪讚緊我呢~
  
  後記:跳完舞後,我看看鏡中的自已,都不禁嚇了一跳,因為我塊臉紅都好似一個蘋果...又或者係似一個蕃茄...而且,個頭仲好似被一盆水淋完一樣,又亂又濕 ~ :) 

Sunday, March 26, 2006

一件倒楣事!

  今日發生了一件很倒楣的事,對我來說,比踩狗屎、中「頭獎」(雀屎)更難受!!

  事緣係我今日,身穿一身街坊Look,腳踏一雙人字拖,大搖大擺咁落街食飯,本來一切都好順利...點知,我在百佳門外竟遇上一隻污穢不堪的西施狗,就在這個時候,我突然感到右腳濕漉漉,低頭一看,發現自己踢中了一灘水!

  問題就係出在這一灘「水」!第一,點解這灘水會無端端在商場中央位置出現?我環顧四周,附近並無任何與「水」有關的東西喎...再抬頭看看天花,都不見得有漏水的情況...第二,點解這灘「水」是金黃色的呢?而且它散佈的範圍只有一個足球的平面般大...第三,點解那隻西施狗會在這灘「水」的不遠處...!!!

  直覺話我知,我踩中的,是一灘狗尿!!但最令人噁心的,是我全隻右腳掌,都滿是這些金黃色的「水」,誰叫我穿上一雙薄薄的人字拖呢!

  我即刻想棄「鞋」退回家,但又無理由赤腳走路,容咩易再中招..!最後,在阿威的攙扶下,我用一張紙巾墊著那隻濕淋淋的拖鞋,慢慢的「滑」回家,途中還要被阿威「狂笑」呢!勁慘~

Sunday, March 19, 2006

「瘦身」大計

  自從告別「鐵腳.馬眼.神仙肚」的記者生涯,轉而躋身OL一族之後,我發覺自己愈來愈有「福相」,何解?因為我的體重正在直線上升!!!(實不相瞞,短短半年,我身上的「豬肉」已經增加了至少10磅......現在總重量已衝出120磅的關口了!!)

  面對如此龐大的身軀,說實在,真的有點沮喪,有時真係會諗:「這是否報應呢?係咪因為以往自恃食極都唔肥,不斷吃不斷吃,現在一次過『回本』?」有時候看見鏡中的自己,看見那張「胖嘟嘟」的肥臉,都不知道應該感到悲哀或是歡喜.......悲,是因為過往那張尖尖的臉蛋不復再;喜,是現在的肥臉確實係臉色紅潤,一副健康的模樣!所以話呢,凡事都真係有兩邊,究竟要瘦定要健康先?!

  我就當然想兩樣都要啦!為了達到這個目標,為了迎接夏天的來臨,我決定展開「瘦身療程」(澄清一點,我所謂的瘦身,並非以「一條柴」為目標,我只係想瘦返少少咋!現在的確係混身是肉!)。這個「療程」包括:
  • 早餐吃麥皮
  • 減少晚餐的份量(例如:只吃半碗飯,甚至以麵包為晚餐......)
  • 放工後前往舒適堡做運動(一星期最少做三日)

  以上各點,都是小妹初步的構思,希望我可以有堅定的意志,去完成這個「療程」,希望......希望.....希望可以「跌回」110磅的關口吧......!

 

Sunday, March 12, 2006

2006年-生日大事



剛剛過了生日半個月,今天才正正式式將照片放上網...大家有時間都不妨瀏覽瀏覽:
http://hello.to/vvchu

話時話,我生日當天去了迪士尼,由於是壽星女的關係,我當日獲發一個襟章,大大隻字寫上"happy birthday",所以去到邊,都有工作人員同我賀壽!雖然生日都無咩特別優惠,但能夠有咁多人同我講聲生日快樂,氣氛都唔錯架!!而且,d卡通人物見到我個生日襟章,都會對我特別熱情,真係好鬼開心架!!

呀,再講多件事大家知~
我生日當天,竟然收到紅十字會的電話,佢地原來打來叫我去捐血喎!!事緣因為我是A-血型...由於負型血比較罕有,而咁岩又有個病人等住輸A-血...所以,我就收到個咁樣的「生日電話」。可能對紅十字會來說,呢件係一件好普通的事,但對我呢個又怕打針又怕捐血的人來說...就絕對係一件「大事」,而且當天是我生日喎...無理由拒絕架嘛...呢D善事一定要做!!!

終於...兩日後, 我便抱著戰戰兢兢的心情踏進捐血站...在極度恐慌的情況下...面對著針筒的威嚇下...捐出450cc的熱血...

Welcome


大家好!

小妹自從離開新聞界後,都甚少機會舞文弄墨,
希望日後透過這遍小小「空地」,能為平凡的生活寫下點滴,
亦為偶爾失憶的我,寫下一點回憶!