這麼遠．那麼近

　　今晚，我突然收到一個來自瑞典的長途電話，當我聽到電話筒傳來的一聲「喂，豬豬」，我已經估到是她！

　　她，名叫Carrie(茄茄)，是我中七時的同窗好友，但大學畢業後，她一直居於瑞典，每年只回港一次，我們八年來聚少離多，而實際相處的日子，其實也只不過是中七那短短數月，你知啦，中七的校園生活是最短的，因為大部分時間都是預備A-level的來臨。但奇怪的是，數個月的相處，竟換來了一生的好友，人與人之間的相處真係很奧妙，有些人，你日見夜見，就是擦不出火花，但有些人，卻會因為一、兩次的交談，而結下不解之緣。

　　我剛收到電話時，她第一件事竟然是問候我的病情，一個在地球另一端的朋友，竟然千里迢迢致電問候，你話係咪好感動先！之後她又說有「好消息」告訴我，我還以為是她與拍拖多年的瑞典男友終於拉埋天窗，原來「好消息」是她即將於6月10日返港度假，今次仲會逗留6星期。

　　以前我做記者時，即使她回港度假，我也礙於工作不定時的關係，難以抽空相見，即使見面，也是匆匆忙忙的，現在轉了工，朝九晚六的生活，相信屆時可以好好聚舊，不過，對我來說，真正的「好消息」是她計劃於明年取得瑞典戶籍後，回流返港大展拳腳！憑她的博學多才，我相信在香港必有所為。

　　茄茄，加油呀！ :)

開始倒數......

　　病了3日，我終於都好番啦！而且今次病一病，仲有意外收穫添～就係無端端輕了好幾磅～～太好啦！不過，呢ｄ「收穫」一次就已經好足夠．．．千祈唔好再病．．．太辛苦啦！！我仲要抖足精神去旅行架！

　　還有9日咋！好緊張．．．我諗．．．我係時候開始倒數了．．．嘻嘻嘻～～

打敗仗！

4月19日，我終於病倒了．．．
　　
　　話說這天我上班途中，已感到胃部不適，好似好想嘔咁．．．你知啦，我每天都要由沙田遠赴香港仔，車程都確實好遠，最驚係搭車途中，嘔吐大作．．．咁就好衰啦！幸好，我最終都平平安安抵達公司，原以為一切都會雨過天晴．．．點知．．．
　　
　　吃過午飯之後，情況似乎更差，我的胃部不斷在抽筋，簡直令人痛不欲生，但我又唔想睇西醫喎，因為我最憎就係食西藥！！所以唯有死頂，講真，有時候有些病，係不用看醫生，都會慢慢好番．．．我期望今次都一樣．．．點知．．．

　　到了3:30pm，我終於頂不順，完全無法投入工作，在眾同事力勸下，我終於請了2小時的病假，仲電召的士回家好好休息．．．我臨離開公司時，我的上司還特登摷了兩個膠袋俾我，以防我在的士「發作」．．．

　　幾經辛苦，我終於拖著極度不適的身軀登上的士了，由於上車前我已經好想嘔，所以在車上我完全唔想說話，就連打電話俾阿媽及阿威的力氣也沒有，那一刻我只係想快些回到家，點知個司機鬼咁多野講，不停咁問我野，煩到爆，而我每次都係好敷衍咁回應佢，諗起都有點唔好意思，無辦法啦，我真係想嘔的！

　　塞完一輪車之後，終於都歸家在望了，就在呢個時候，我．．．突然嘔吐大作，好彩我上司為我準備了膠袋，否則個司機都有排抹．．．不過，話時話，真係好樣衰．．．！好彩個司機好好人，我向佢道歉時，佢竟然反過來安慰我：「唔緊要，病就當然係咁啦，我病時都會嘔，你係咪腸胃病呀？真係唔緊要喎。」嘩，佢一邊安慰我，都不忘要繼續問問題，不過，我都好多謝佢無黑口黑面對住我，雖然我無弄髒佢架車，但始終我都在佢架車內嘔．．好臭架嘛！

　　看過醫生後，證實我患上腸胃炎兼有少少發燒，要好好休息，吃得要清淡一點，所以今天（4月20日）我都請了病假．．．留在家中休養呢！

　　明天我一定會好返的！一定！！！

　　

又係時候去旅行 ～！

　　又到五月天，又係時候去旅行了！今年究竟去邊好呢？

　　識得我的人都應該知道，每年我都總會在百忙之中抽抽空，暫別這個「煩」「忙」的大都會，「離鄉別井」抖一抖，有時仲會一年去兩次遠遊添！去年夏天，我就去了倫敦和捷克，今年呢．．．都真係好傷腦筋！

　　事關今年我同阿威計劃在5月初出發（順道慶祝周年紀念日），剛巧5月又有勞動節、又有佛旦，兼且並非旅遊旺季，確實係一個外遊的好時機！但正正因為並非旅遊旺季的緣故，市面上一時間有太多的優惠機票、優惠旅行團，令我們花多眼亂。

　　我們諗過再去英國或去美國，因為呢兩個地方的機票都好鬼便宜，但係如果去英國，就會去埋睇英超聯，因為我應承過陪阿威去看足球賽事，但你知啦，門票好貴的，英國物價都好貴的，而且去年才去過英國，所以......最後都係遲些才再去（或者下年啦）！

　　至於美國，機票都好平呀！跟團都好似係around $6000左右，去埋拉斯維加斯，但去美國，我又想順道探探在三藩市的親戚，不過，stay behind再補機票飛去三藩市都唔平架......！再者，我媽咪本來已經好想去美國探婆婆，我又無能力請佢去喎，若佢見我自己去，無佢份，一定會唔開心，所以，最後都係決定等我有多ｄ錢，可以support埋媽咪的機票，才再計劃美國之旅！

　　咁究竟我今年會去邊呢？　計來計去，我們決定不是柬埔寨，就是埃及！

　　呢兩個地方都有好著名的古蹟，都同樣備受各方好友的「推崇」，個個都同我講，話呢兩個地方好靚，好值得去！本來，為了省錢，我們係計劃去柬埔寨的，但柬埔寨一般都只得五、六日行程......我就覺得唔係太夠喉囉！

　　而埃及的行程，一般都有九至十日，不過價錢亦相對貴過柬埔寨好多，所以一直以來我們都心大心細！正當我們好忐忑的時候，阿威又得知一個消息，原來卡塔爾航空（與阿聯猶齊名的）近日剛剛開了一條新航線，係由香港飛去巴林再轉飛埃及的！卡塔爾航空為了吸引港人，近日做緊優惠價，5月只辦兩班優惠機位，機票連團費都只不過係$6599咋！埃及喎，6000幾蚊真係好鬼抵！而且那兩班機位咁岩就係fit到我們的時間喎，咁無理由唔報名架嘛！

　　所以，唔駛我多講，大家都應該估到我們最後會去邊啦！當然係埃及啦！

　　各位，如果你在5月有假期，都不妨去旅行社望望，趁暑假未到，係時候出國玩一玩啦！長命功夫長命做，青春卻不等人，趁仲行得走得，仲勉強叫做年輕，快ｄ去行「萬里路」，充實下自己啦！^_^