Wednesday, April 18, 2007

讀書生涯,好難捱!

自從今年1月開始,我便展開了「邊做邊讀」的生涯(一邊工作一邊讀書)!但與此同時,我的人生亦進入了一片混亂狀態!

我其實好鐘意讀書,好鐘意返學(但唔鐘意考試),還記得今年第一日返學時,簡直滿懷憧憬,極之享受這種課堂的感覺...真係一種久違了的感覺!點知...過了兩星期,惡夢就已經開始...

話說我第一個學期是修兩科,分別是Marketing及傳媒道德,一星期有兩晚都要去上堂...本來都無咩問題,但點知Marketing呢科,d功課多到爆哂燈,幾乎每個星期都要交功課,即使無功課,都總會有測驗,而每次測驗的範圍又多到不得了...但n個測驗夾埋,其實都只不過佔100分內的20分左右...係咪玩野...讀咁多,即使測驗中能夠攞滿分,可能只係佔全科總成績的4、5分咋!!!

除左測驗,仲有那些無窮無盡的功課!呢d功課全部都係group work來的,咁即係話,差不多每個星期,都要搵時間約d同學出來開會,但個個都要返工,大家返工時間又唔同,你估我地真係讀full time咩?!邊有咁得閒架!!而且d功課仲次次都好heavy!阿sir要求又超高,真係俾佢玩死!做到我地個個得返半條命...真係好想同阿sir講一句:係咪痴左線!

不過,雖然係辛苦,但又真係學到野的...但真係好鬼辛苦lor!!我近呢幾個月,已經因為讀書,失去了好多人生樂趣!成個人殘哂...都唔知為乜!

每晚唔係返學,就係開會傾功課;又或者係埋首電腦前面狂做功課;又或者為左應付測驗,捱更抵夜咁讀書讀書再讀書;仲要在百忙之中,留返d時間來應付日常工作(即係要OT呀!)...真係人都癲...

不過,希望過埋5月,一切都會回歸正常...因為到時候,第一學期將會結束,我亦將告別這一科呢~~真係要賀一賀~~ ^_________^

原來已經半年了...

原來,對上一次寫blog,已經是半年前的事了...

半年時間,說長不長,說短也不短,但估唔到在這半年內,我的心情竟然像過山車一樣,遇過了最恐怖的人,渡過了最惶恐的歲月,但也得到了最可貴的經驗...人,總要經一事長一智,希望我會永遠記住呢一個教訓,更加希望我以後可以醒少少...唔好再要我身邊d人擔心...







 

Sunday, October 15, 2006

難忘中秋夜

八月十五,年年皆有,但今年中秋,對我來說卻另有一番意義...

聽聞今年中秋的月亮是特別圓、特別亮,因為...今年是月球在9年以來,最貼近地球的一次...

又聽聞,若人在異地,中秋佳節定必更會思鄉,因為...月亮,總是故鄉明...

今年中秋,我人在異地,卻亦在故鄉,在月正當空之時,我和阿威就在北京的天安門前,站在毛主席(照片)跟前賞月。

原來我們偉大的祖國,每逢中秋佳節,同胞們都有一個趣怪習俗,他們不是玩燈籠,而是放風箏呢!看著一隻一隻的風箏,在皎潔的月亮下,朝著同一方面齊齊飄揚,這種感覺很奇妙...唔知點解,突然有一點愛國的情懷...很奇妙...

不過,最奇妙的,是今年的中秋,我得到了一些東西,亦發現了一些東西...原來,我是一個很幸福很幸福的人...幸福,原來真係好簡單!

希望以後每一個中秋,我和我身邊每一個人,都一樣會過得幸福~
 

我回來了...

很久沒有寫Blog了,原因只有一個,就係懶!!

不過,近日發現自己的記性好像正在慢慢地退化,生怕終有一天,會不幸患上「老人」痴呆,故決定再次執筆,偶爾記下生活點綴。

Friday, June 16, 2006

世盃趣錄

  近日全球掀起世盃熱,我呢個完全不懂足球的無知婦孺,當然都會湊湊熱鬧啦!所以我即使唔識睇波,都會好留意世盃賽事,例如會打聽一下今晚有邊隊vs邊隊,了解一下究竟有邊場波係應該會好精彩,有邊場波係萬勿錯過。

  話說上星期六(好似係星期六),就有一場英格蘭vs巴拉圭,由於我對世界的版圖唔太認識,加上孤陋寡聞,對「巴拉圭」呢個國家印象不深,所以一直都只係記住呢三個字的發音而己...

  但係好衰唔衰,我自己又扮哂醒喎,仲走去阿威(佢好鐘意足球的)面前認叻,以下就係我們的對話內容大要~

  我:我知今晚場波你一定會看!
  威:你又知?你知邊場vs邊場咩?
  我:梗係知啦!英格蘭vs瓜拉瓜呀嘛!!
  威:...... ...... ...... ...... ......



後記:
我覺得熟悉世界盃的人,應該都好熟愁呢個世界的版圖囉... 

Thursday, June 01, 2006

埃及之旅 -- 第一日(下集):開羅

2006年5月4日(星期四)

  經過了「多哈」一遊之後,我更加渴望快些到達埃及,因為多哈實在是一個太無聊的地方!我們在多哈機場等了很久,終於都起飛啦!


  當飛機橫過埃及上空,俯首一看,只見一片茫茫沙漠,真係好靚啊!我們到達開羅機場後,便將50元美金兌換為埃及磅,點解兌咁少?因為在埃及,美金已經好通行,根本唔需要兌咁多埃磅!


開羅市集

  到達開羅之後,我們第一站就去了開羅市內的一個大市集,發現當地人好鐘意食水煙,而且食水煙對埃及人民來說,是十分普遍的,不過我就無試過...因為我總覺得這些水煙有點似鴉片煙,不試為妙!


  講起這個市集,就不得不提一件趣事!話說我當時閒逛完畢,百無聊賴,就站在一旁等候集合時間的來臨,誰不知,突然瞥見一位印巴籍大叔,拿著一部Nokia N70的手機為我拍照!嘩,我第一刻的確係怔了一怔,始終人生路不熟,唔知對方係甚麼葫蘆買甚麼藥,點知佢影來做咩喎!

  正當我百思不得其解之際,大叔身旁突然竄出一個害羞的小男孩,男孩的媽媽(相信係大叔的妻子)心知我發現了大叔偷影我,便取笑那名小男孩,更慫恿他走來我身邊(其實我只係憑他們的動作,猜他們的說話而已),到了這一刻,我終於明白是甚麼一回事,如果無估錯,他們應該是遊客,可能小朋友見到有個東方人(即係我)在埃及出現,覺得好有趣,所以便叫佢老豆偷偷幫我拍照。有見及此,我同阿威當然都好禮貌咁回應一下,最後,當然係大家來一張大合照啦!^_^


通宵特快列車

  遊覽完市集之後,我們又要趕路了!因為我們的行程,是要由尼羅河的上游(阿斯旺)開始,一直玩返轉頭,即係由尼羅河上游玩到去下游(開羅),所以我們便要趕在入黑之前,乘搭特快列車,通宵趕往阿斯旺!

  根據行程記載,我們會通宵乘坐這輛「特快列車」,所以會入住列車上的頭等車廂,仲保證係二人一房!頭等車廂喎,聽落都唔錯啦!所以一直都有點期待...點知...

  先講這輛列車的外觀,車身全被沙塵所蓋,可能係長年累月在風沙中奔馳之故啦!至於車廂...真係令人大失所望!

  廂房極窄,而且頗為骯髒,雖然每個廂房都設有洗臉盆,但要去洗手間,就一定要走出房外,行到去車卡頭或尾,與全卡乘客共用一個廁所!所以都幾唔方便!
  至於列車上的晚餐,就更加不堪一提,因為係超級難食的!一人一個飯盒,有一兜飯,一個橙,但係d飯又硬又凍,難食到不得了,d肉就韌到咬唔開,總之就看到都唔開胃啦!我最後都係食了少少,已經頂唔順要放棄,阿威仲寧願食餅乾(我們自己帶去的)!

  由於我們忙了一日,又搭完飛機,又趕完火車,早就已經疲憊不堪,所以這一晚,我們好早就入睡,至於我們睡哪裏?其實車廂內的坐椅一揭開,就會變成兩張上下格床!這晚,我在「轟轟轟」的列車聲中,很快很快就進入夢鄉,仲睡得很甜呢!

...待續...

Wednesday, May 31, 2006

埃及之旅 -- 第一日(上集):卡塔爾航空+多哈

2006年5月4日(星期四)     由於香港至今仍未有直航機飛抵埃及,無論選擇那一間航空公司,都定必要在中途停一停站,轉一轉機。我們所乘搭的卡塔爾航空亦不例外,由香港起飛,8小時後終於抵達多哈,在多哈停留約6小時,再轉4個小時飛機往開羅。

  先講講卡塔爾航空。卡塔爾航空是中東知名的航空公司,聽說是與阿聯猶航空齊名的!而且被國際知名航空調查機構Skytrax評為五星級航空,與國泰航空、新加坡航空屬同一級數!


  事實上,我覺得卡塔爾航空都係唔錯的,除了飛機座椅的顏色及機上的主要乘客(中東人),是與國泰航空有所分別外,基本上我認為分別不大,每個座位都一樣設有獨立電視仔,提供的電影頻道都幾多,好似有超過40個電影頻道(仲有上畫不太久的「KingKong」、「斷背山」、「NaNa」等),又有好多音樂頻道,當中有些是我們熟悉的歌曲,也有不少電視遊戲,總之應有的,都盡有了!飛機餐都ok啦,空姐質素一般啦,空中少爺就幾靚仔!嘻嘻!

  而多哈這個地方,其實是卡塔爾的首都,位於杜拜旁邊,是一個非常富庶的產油市,亦都係今年(2006年)亞運的主辦城市。(即係成功打抵香港,取得亞運主辦權的那個城市呢!)

  我們到達多哈之後,由於等候轉機的時間太長,旅行團安排我們在多哈市內觀光,不過,老實講,多哈真係無咩好看,亦無咩值得欣賞!首先,機場仍在裝修(唔知趕唔趕得及亞運之前裝修完畢...),再者,工作效率太慢,現場所見,入境時已有兩名旅客無故被「扣查」,職員拿著他們的護照左看看,右看看,搞了差不多半小時,才肯放人走,而其中一個就係阿威!

  再講市內觀光,我們在多哈第一站就係去「駱駝市場」,顧名思義,除了駱駝,甚麼也看不見,只係見到好多駱駝在吃草,都唔知有咩好看!第二站去「鮮魚市場」,聽見個名都無興趣啦!


  起初還以為多哈的魚業好興旺,又或者盛產一些特別的魚類,點知...甫下車,已聞得一陣臭(我覺得似公廁味,阿威話似殮房味),之後入去那個市場內看看啦,嘩!不得了,簡直就係一個專賣魚的街市!!完全諗唔到,一個賣魚街市竟然都可以做觀光景點!!!

  第三站,就係「蔬果市場」,又係市場,即是又係街市,完全無興趣,但都入去走了一圈,蔬果種類同香港都差不多,沒舍特別!之後去了「馬術俱樂部」,其實都係同香港馬場差唔多,唯一分別,就係多哈是一個仍未被商業污染的城市,所以d人都純樸些,見到我們有遊客到訪,便立刻拉隻馬仔出來,還任我們「拉頭馬,拍拍照」,最重要係,呢一切待遇都係費用全免,如果是大陸或埃及等「講錢」的地方,相信又會被人敲詐一筆!

  遊覽完畢,又返回機場等轉機了。
...待續...  
  

Sunday, May 21, 2006

從埃及回來了~~


  埃及之旅於2006年5月12日已經圓滿結束!呢9日的遊歷的確令我目不暇給!無論是埃及歷史、傳說、神話,以至今時今日在埃及的生活體驗,都是極之豐富的!

  如果大家捨得掏出約1萬元的旅費(團費約7000元,再加埋導遊小費約1100元、離境稅及燃油附加費等雜費約1400元),而又有一個頗長的假期(起碼要有9日),我會建議大家去一趟埃及,真係好值得去的!放心啦,在埃及無咩野買的,我都只係用了約2000元港紙咋!(當中已經包括了去紅海看珊瑚及坐吉普車遨遊沙漠,好好玩架!)

  至於「點解埃及咁好玩」?其實我在埃及每天,都有記下我的行程,以及我在當天學會/認識到的歷史故事及知識,希望將種種體會記錄下來,為善忘的我留下一些實實在在的回憶,也希望和大家分享一下我的感受。

  當然,這些感受都純屬個人感覺,而我的所見所聞亦只不過是史實之中的冰山一角,但總算是一些感受,一些體會吧!不過,由於9日的行程豐富,當中涉及的知識太多,所以我需要好好整理一下,期望在不久之後,可以將埃及的點滴逐一呈上...請耐心等候!

Wednesday, May 03, 2006

出發了~!

  還有15分鐘,我便要搭巴士往機場,然後坐卡塔爾航空00:45班機,直飛多哈(今年舉辦亞運的城市),之後再轉機往埃及開羅!!!聽說開羅現時有30度,都幾熱架!但到達埃及之後,我們會去阿斯旺,,阿斯旺的溫度,仲高達40度添呀!!我諗9日之後,我會變了一隻炭燒黑豬回來...希望大家還得我啦!嘻嘻!
  呀!忘了講一件好重要的事,就係今次埃及之旅,我有一個重大責任,就係要照顧阿威,因為阿威日前去踢波時,竟然踢傷了隻右腳,現在成隻腳掌腫哂!好似隻紅燒豬蹄咁...行路重慢到不得了...都唔知佢去到埃及點行...我諗...我可能要揹佢!大鑊!!!
  好了,是時候出發了!我5月12日才回港!要暫別各位一段時間啦!拜拜!:)